Тема: Новий Рік
З Новым Роком
Сію, сію, пoсіваю,
З Новым Роком вас витаю.
В Новым Році, добры люде,
Най вам доля красша буде.
Штобы были всі здоровы
І в Білянці і в Ганчові,
На Бодаках, в Зындранові,
В Лосю, Грабі, Маластові,
Во Фльориці і в Кункові,
І в Новици, Ґладышові,
Та в Тыляві і в Лабові.
Всі з Розділя і Бортного,
І з Вірхомлі, Вапенного,
З Прегонины і Святковы,
З Перегримкы і Шляхтовы,
Та з Вільхівця і Высовы,
Полян, Волі і Брезовы,
Ізб, Перункы і Мысцови.
Ждыня, Фолюш і Терстяна,
Пстружне, Устя і Тиханя,
Рыхвалд, Шквіртне, Радоцина,
І Свіжова і Мацина,
Тылич, Мшана і Крениця,
Солотвины і Баниця,
Та Мушына і Снітниця,
Ріпник, Котан і Ропиця,
Ропа, Ріпкы і Ропянка,
Шкляры, Дошно і Боднарка.
Чырна, Чорна, Вышовадка,
Чорне, Мокре і Завадка,
Смерековец і Смеречне,
Щавник, Щавне і Конечна,
Та Ожынна, Незнайова,
І Розтока і Дальова.
Лупків, Квятонь, Опарівка,
Бонарівка і Ванівка,
І Явіркы і Явірник,
І Команча і Барвінок,
Тай Мохначка і Ліщыны. –
Словом вшыткы з Лемковины.
Тіж і до вас Лемкы мова,
Што од Одры до Азова
Та за морьом, на чужыні,
Щестя вам бы, долі нині!
Штобы ниґда не хворіли,
Што-б вас плечы не боліли,
Што-б здоровы груди мали –
Не кашляли, лем співали;
Добрі іли, мало пили
І до праці мали силы,
Міцно в ногах ся тримали
І головом міркували
Што і як, і чом, і нашто
В світі правда і леда-што.
Што-б вас в боці не кололо
Ани в крижах, і николи
Не стрікало вас в похребті,
Добрі спало ся, як не спит,
Гарде снило ся, як не снит.
Най зародит ся пшениця
В Петра і Афтана, в Грица,
В Маркіяна і Максима,
В Онуфрия, в Никодима,
А і в вдовы Максимихы,
Та і старой Василихы.
Купу стогів на помірках,
Полно зерна при обірках –
На перогы і галушкы,
І на хліб, і на ватрушкы,
На варене і смажене,
Выпікане і свячене,
А кєд дахто ріже пана –
І на торты марципаны.
Што-б зродили ся вам в поли
Капустичка, бараболі,
Крумплі, бульба і зимякы,
І компері як банякы,
Тай бандуркы, но і ґрулі.
В саді – йоны, беры, дулі,
І ринеты, антонівкы,
Райскы ябка і спасівкы,
І ренґлоды і венґєркы,
Вшыткы солодь, як цукєркы.
Най высокій лен выросне,
І в Марини і в Єфрозкы
На кабаты і ґорсеты.
На лайбикы, оплічата,
Ґачы, ґачкы і ґачата.
Што-б жывину файну мали,
Зерном – сіном годували. –
Буде масло і машлянка,
Будут сыры і сметанка.
Буде мясо тіж, в росолі,
І омаста в бараболі,
Будут драґлі і котлеты,
Будут шынкы і паштеты,
І кобаса, солонина.
Будут грошы – полна скриня,
І добробыт в каждій хаті.
І будеме так богаты,
Што-б уж піше не ходити,
Лем автами ся возити
І до склепу-магазину,
І до кумів на гостину.
Іщы жычу добрых сватів, –
Най ся женят неженати,
Дівкы замуж повыходят,
А женаты – діти родят.
Што-б миняли вас клопоты
І вы жыли без турботы.
Штобы сонце вам так гріло,
Што-б не мерзли, не віпріли,
Штобы літо было літом,
Зо спекотом, дощом, квітьом,
А і зима – зимом была,
Хоц з морозом, але мила.
Штобы славу добру мали,
На гостинах – гостювали,
На весілях – танцювали,
На хрестинах – поспівали,
На поминках – поплакали.
Штобы было все як треба
І для інчых і для себе,
Штобы всі вас поважали,
Шанували, величали,
А в потребі, при нагоді
Близкы были вам в пригоді.
Дітям тіж я повіншую,
Най вас люблят і цілуют
Вшыткы рідны, мама, тато;
Най ден каждий буде святом.
Што-б вы старшых шанували,
До наукы потяг мали,
Што-б не были вы ледачы –
Младых літ не марнували
Але жытя познавали
З книжком, а пак в честній праці.
Іщы на тым твердо стою,
Штобы жыли всі в спокою.
Більше што-б не воювали,
А ґаздове – ґаздували,
Робітникы – зарабляли,
Вчены, жебы мозкували
А і космос здобывали.
Най ся вам весело жыє,
Кому смішні – най ся сміє,
А тужыти, вірте, гріх –
Смуток мине, приде сміх.
Так вам Лемкы вшыткым жычу,
Сію, сію... щестя кличу.
Сію жыто і пшеницю,
Овес, гречку, сочевицю,
Вам – на щестя і пашницю,
Собі же – на паланицю.
Іван Желем
Задачы:
1. Навчый ся чытати новорочны желаня.
2. Зверний увагу на словництво (назвы сел, імена, части тіла, рослины...).