Тема: Пестливы і грубы слова – дальша част
Дорогій Петрусю!
Витам я Тя, витам, моє ты Сонечко,
Пишу я до Тебе сердечне словечко.
Пишу я до Тебе, зоцло мі ся страшні,
Бо уж не памятам, як цілуєш красні.
Траплю ся Дорогій, ци часом ночами
Не ходиш ти деси за дівчатисками.
Траплю ся окрутні, бо знам о што ходит,
Же кажде дівчатко до Тебе приходит.
Підходит під хыжу, зазерат в выгляды,
З тыма дівчатами Ты си не даш рады.
Не дост, же до Тебе все ся усміхают,
То іщы коліна своі одкрывают.
Не сами коліна, а і грубы мяса
І уж занедолго будут на ґоляса.
Вдівают на себе червены підвязкы
І зелены штрінґы, што за глупы ляскы.
Але я Ти вірю, ты моє Сонечко,
Прогнам дурны думкы, ты моя Мышечко.
Снило мі ся, снило, же-м Тя цілувала
Аж в кінци-м з постелі на дылины впала.
През выгляд єм взріла крас як Ты звіздочку,
Аж єм си зронила маленьку сылзочку.
Долго мя не было, бо мушу ся вчыти,
Но бо глупой жены не хтіл бы-с любити.
Шугаю дорогій, я през Тя не ілам,
Бо на Твою знимку заєдно смотрилам.
Цілу ніч не спала-м, ніч была холодна,
Не спала-м про тото, же-м была голодна.
Колиси єм ішла і про тя думала,
Аж мя зморочыло і в столпа єм впала.
Но а потім Милий вельку-м булю мала,
Вшыткы звідували од кого-м достала.
Думала-м, думала-м о Тобі ночами,
А потім єм мала мішкы під очами.
Хтіла бы-м я, хтіла, під олтар уж іти,
А Ты Ваґабундо не хцеш ся женити.
Моя врода така, аж болит голова
Скоро ход під олтар, бо-м втечы готова.
Барз ся не надумуй, мій Ты дорогенькій,
Куп перстін з брылянтом, але не маленькій.
То вшытко миленькій, ґамбочкы пресылам,
знай, же Твою знимку при серци зложылам.
Твоя Настка
Настка Вільчкєвіч
кыцьо дурбак
коханий/ кохана гад
мышка бортак
жабка толчок
ангелик глуптак
сердечко свиня
миленькій/ миленька паця
звіздочка сомар
сонечко тупак
медведик гунцвот
квіточок фрас
принцеса перун (ясний)
рыбка ваґабунда
пташок бетяр
песок паскуда
Задачы:
I. Прочытай текст Дорогій Петрусю!
II. Спрібуй написати подібний жартібливий текст.