Тема: Колядуваня. Святочны і новорічны желаня
Найбарже знаны лемківскы коляды:
Бог ся раждає
Бог ся раждає
Хто-ж Го може знати
Ісус му імя,
Мария му мати.
Тут ангели чудят ся
Рожденнаго боят ся
А віл стоіт, трясе ся
Осел смутно пасе ся
Пастыриє клячут, клячут
В плоти Бога бачут, бачут
Тут же, тут же,
тут же, тут же, тут
Мария му мати
Прекрасно співає,
А хор ангельскій
Ій допомагає.
Тут ангели чудят ся...
Йосиф старенькій
Колыше дітятко
Люляй же, люляй
Мале Отрочатко.
Тут ангели чудят ся...
Йосиф старенькій
Марию поймає
І до Єгыпту
З Христом утікає
Тут ангели чудят ся...
І мы смиренны
Богу чест оддаймо
Слава Вовышні
Йому заспіваймо
Тут ангели чудят ся...
Небо і земля
Небо і земля, небо і земля
Ныні торжествуют
Ангели, люде, Ангели, люде
Весело празднуют
Христос родился, Бог воплотился
Ангели співают, цариє витают
Поклін віддают, пастыриє грают
Чудо, чудо повідают
Во Віфлеємі, во Віфлеємі
Весела новина
Чыстая Діва, чыстая Дива
Породила Сына
Христос родился, Бог воплотился...
Слово Отчеє, слово Отчеє
Взяло на ся тіло
В темностях земных, в темностях земных
Сонце засвітило
Христос родился, Бог воплотился...
Во Віфлеємі ныні новина
Во Віфлеємі ныні новина
Пречыста Діва зродила Сына
В яслях сповитий поміж быдляти/ 2х
Спочыл на сіні Бог необнятий/ 2х
Уж Херувимы славу співают,
Ангельскы хоры Спаса витают
Пастыр убогій несе, што може/ 2х
Што-б обдарити Дітятко Боже./ 2х
А ясна зоря світу голосит
Месия радіст, щестя приносит
До Віфлеємі спішым всі ныні/ 2х
Бога витати в бідній Дітині./ 2х
За світлом звізды деси зо Сходу
Ідут Три Царі княжого роду,
Золото, дары, кадило, миро/ 2х
Враз з серцьом щырым несут в офіру./ 2х
Ісусе милий, мы не богаты,
Золота, дарів не можем дати
Но дар ціннійший несем од мира/ 2х
То віра серця, то любов щыра./ 2х
Глань оком щырым, о Божий Сыну.
На нашу землю, на Лемковину,
Зышли із неба дар превеликій,/ 2х
Што-б Тя славила во вічны вікы./ 2х
Нова радіст стала
Нова радіст стала
Яка не бывала
Над вертепом зоря ясна
Світу засіяла
Де Христос родил ся
З дівы воплотил ся
Як человік пеленами
Убого повил ся
Пастушкы з ягнятком
Перед тым дітятком
На коліна припадают
Христа-Бога прославляют
Давид выгрыває
В гушлі ударяє
Мелодийні і пречудні
Христа-Бога выхваляє
І мы тіж співайме
Христа прославлайме
Із Мариі рожденного
смиренно благайме
Просим Тебе Царю
Небесний Владарю
Даруй літа щестливиі
Того дому господарю
В мирі проводити
Тобі угодити
І блаженно в царстві Твоім
По вік віків жыти
В глиубокій долині
В глиубокій долині
Звізда засвітила
Де Пречыста Дива-Мати/ 2х
Сына породила/ 2х
Як його зродила
Так його повила
Аааа ллюляй же Ты Сыну мій/ 2х
Бо я буду спала/ 2x
Мамцьо, моя Мамцьо
Поспий си годину
А я піду тай до раю/ 2х
Принесу новину/ 2х
Ой Сыну, мій Сыну
Де-ж Ты того годен
Кєд Ты не маш дві годины/ 2х
Як єс ся народил/ 2х
Мамцьо, моя Мамцьо
А я того годен
Я сотворил небо, землю/ 2х
Іщы-м ся не вродил/ 2х
Задачы:
1. Переаналізуй языково тексты коляд, застанов ся, котры слова і выражыня сут паралельны до украіньского языка, котры взяти сут зо староцерковного.
2. Навчый ся співати принаймі єдну коляду (в залучнику Небо і земля).
З Новым Роком
Сію, сію, посіваю
З Новым Роком вас витаю
В Новым Році, добры люде,
Най вам доля красша буде.
Штобы были всі здоровы
І в Білянці і в Ганчові,
На Бодаках, в Зындранові,
В Лосю, Грабі, Маластові
Во Фльоринці і Кункові,
І в Новици, Ґладышові
Та в Тыляві і Лабові.
Всі з Розділя і Бортного,
І з Вірхомлі, з Вапенного,
З Прегонины і Святковы
З Перегримкы і Шляхтовы
Та з Вільхівця і Высовы,
Полян, Волі, Березовы,
Ізб, Перункы і Мысцовы.
Ждыня, Фолюш і Терстяна,
Пстружне, Устя і Тиханя,
Рыхвалд, Шквіртне, Радоцина,
І Свіржова, і Мацина,
Тылич, Мшана і Крениця
Солотвины і Баниця
Та Мушына і Снітниця,
Ріпник, Котан і Ропиця.
Ропа, Ріпкы і Ропянка,
Шкляры, Дошно і Боднарка.
Чарна, Чорна, Вышовадка,
Чорне, Мокре і Завадка,
Смерековец і Смеречне,
Щавник, Шавне і Конечна
Та Ожынна, Незнайова,
І Ростока і Дальова.
Лупків, Квятонь, Опарівка,
Бонарівка і Ванівка,
І Явіркы, і Явірник,
І Команча і Барвінок
Та-й Мохначка і Ліщыны –
Словом вшыткы з Лемковины.
Тіж і до вас, Лемкы, мова,
Што од Одры до Азова
Та за морьом на чужыні:
Щестя вам бы, долі ныні!
Штобы ниґда не хворіли,
Што-б вас плечы не боліли,
Што-б здоровы груди мали –
Не кашляли, лем співали;
Добрі іли, мало пили,
І до праці мали силы,
Міцно в ногах ся тримали
І головом міркували
Што і як, і чом, і нашто
В світі правда і леда-што.
Што-б вас в боці не кололо,
Ани в крижах, і николи
Не стрікало вас в похребті,
Добрі спало ся, як не спит.
Най зародит ся пшениця
В Петра і Афтана, в Грица,
В Маркіяна і Максима,
В Онуфрия, в Никодима,
А і в вдовы Максимихы,
Тіж і в старой Василихы.
Купу снопів на помірках,
Полно зерна при одвірках –
На перогы і галушкы,
І на хліб і на ватрушкы,
На варене і смажене,
Выпікане і свячене,
А кєд дахто ріже пана –
І на торты, марципаны.
Што-б вродили ся вам в поли
Капустичка, бараболі,
Крумплі, бульба і зимякы
І компері, як банякы
Та-й бандуркы, но і ґрулі.
В саді – йоны, беры, дулі
І ринеты, антонівкы
Райскы ябка і спасівкы,
І ринґльоты, і венґєркы –
Вшыткы солодь, як цукєркы.
Най высокій лен выросне
І в Марины і в Єфрозкы
На кабаты і ґорсеты.
На лайбикы, оплічата,
Ґачы, ґачкы і ґачата.
Што-б жывину файну мали,
Зерном-сіном годували. –
Буде масло і машлянка,
Будут сыры і сметанка.
Буде мясо тіж, в росолі,
І омаста в бараболі,
Будут драґлі і котлеты,
Будут шолдры і паштеты,
І кобаса, солонина.
Будут грошы – полна скриня,
І добробыт в каждій хаті.
І будете так богаты,
Што-б уж піше не ходили,
Лем автами вас возили
І до склепу-маґазину,
І до кумів на гостину.
Іщы жычу добрых сватів, –
Най ся женят неженаты,
Дівкы замуж повыходят,
А женаты діти родят.
Што-б миняли вас клопоты
І вы жыли без турботы.
Штобы сонце вам так гріло,
Зо спекотом, дощом, квітьом,
А і зима – зимом была,
Хоц з морозом, але мила.
Штобы славу добру мали,
На гостинах – гостювали,
На весілях – танцували,
На хрестинах – поспівали,
На поминках – поплакали.
Штобы было все як треба
І для інчых і для себе,
Штобы всі вас поважали,
Шанували, величали,
А в потребі, при нагоді
Близкы были вам в пригоді.
Дітям тыж я повінчую:
Най вас люблят і цілуют
Вшыткы рідны, мама, тато;
Най ден каждий буде святом.
Што-б вы старшых шанували,
До наукы потяг мали,
Што-б не были вы ледачы –
Младых літ не марнували
Але жытя познавали
З книжок, а пак в чесній праці.
Іщы на тым твердо стою,
Штобы жыли всі в спокою.
Більше што-б не воювали,
А ґяздове – ґаздували,
Робітникы – зарабляли,
Вчены жебы мозкували
A і космос здобывали.
Най ся вам весело жыє,
Кому смішні – най ся сміє,
А тужыти, вірте, гріх –
Смуток мине, прийде сміх.
Так вам, Лемкы, вшыткым жычу
Сію, сію... щестя кличу.
Сію жыто і пшеницю,
Овес, гречку, сочевицю,
Вам – на щестя і пашницю
Собі же – на паляницю
Іван Желем